俄羅斯取得二○一八年世界盃主辦權後，總理普京立即向富商「揼心口」，首當其衝當然係申辦過程大出風頭嘅車路士班主阿布拉莫域。普京坦言阿布從政欠缺功績，生意又搬晒去外國，係時候為國家作出貢獻。大家千祈唔好誤會，普京唔係效法黑手黨勒索伎倆，只係發揮「蝙蝠俠」本性，劫富濟貧啫！
俄羅斯力壓英格蘭取得二○一八年世界盃主辦權乜彩都攞晒，但風光背後都要有人埋單找數，如果根據申辦書承諾，俄羅斯政府要支付二十四億鎊（約二百九十四億港元）興建十三個新球場及翻新三個舊球場，另外仲要用多七十億鎊（約八百五十八億港元）改善旅遊及基建配套，即使俄羅斯政府幾有錢，都係個沉重負擔。
綽號「蝙蝠俠」嘅普京，第一個即刻搵阿布開刀，公開表示呢個「關愛基金」預埋佢：「世界盃呢個大Project，我一早就預埋阿布，佢咁有錢，平時又咁慷慨，使少少錢又點會介意？」最抵死係普京指阿布任楚科奇自治區行政長官時欠缺政績，佢咁出名只因係車路士班主，擺到明寸阿布罔顧國家利益，阿布如果想有運行，自然要乖乖將鈔票奉上啦！
現年四十四歲嘅阿布，據《福布斯》估計身家約有七十億鎊，排全球第五十位。眾所周知普京與阿布一向關係密切，今次普京開到聲，相信阿布唔會托手踭。事實上，阿布交「政治保護費」早有前科，當年佢上位做「油王」，就畀咗五億美元先可沾手俄羅斯石油及鋁業。
此外，英格蘭雖然喺今次申辦世界盃落敗，但仍無損申辦大使碧咸人氣，輿論普遍認為碧咸喺今次申辦過程中表現出色，而且擁有政治魅力，係未來英格蘭足總主席最佳人選。不過，碧咸有排先會吼呢個位，因為佢同銀河合約內訂明，約滿後可買美職球隊，話唔定會繼續喺美國做班主，順便進軍荷里活做明星！
本報綜合報道