陳敬然：BB I LOVE U
剛於廣州亞運奪得一面滑浪風帆金牌的「阿英」陳敬然，除了比賽以外，時刻惦念家中十四個月大的囝囝陳靖Jacob，他形容做爸爸的喜悅難以用筆墨表達，更覺得照顧兒子很有挑戰性，笑謂「湊仔難過拎金牌」，不過他仍樂在其中，今年更想送太太一份特別的聖誕禮物，希望「氹佢幫我生多個」！
換片餵奶瓣瓣掂
下周一（13日）就滿28歲的「阿英」已為一子之父，兒子陳靖剛於廣州亞運期間學會行走，他一段邊走邊叫爸爸努力的短片，為當時身在汕尾比賽的「阿英」紓緩不少比賽壓力，結果成功反超前對手衞冕成功，而這面得來不易的金牌，陳靖其實功勞不少！由於「阿英」長期須在外地集訓和比賽，今年只有三個月時間在港，平日得靠手機視像通話來跟囝囝聯繫感情。「阿英」笑說：「好彩阿仔仲認得我。」
亞運返港後小休幾天，「阿英」隨即爭取時間享受親子樂，希望與兒子一同經歷其成長過程：「小朋友零至十歲係最需要父母，我唔想錯過呢個階段。」看來「阿英」對小朋友成長做了不少功課，現在沖涼、換片、餵奶等工夫已不能難倒這位「金牌爸爸」。「阿英」更講出他一套湊仔心得：「我都係從做幼稚園老師嘅太太身上偷師，對小朋友說話時要高音啲，要講BB話，再加啲手勢動作，才能吸引到他注意。」這招十分奏效，Jacob不時跟「阿英」玩個不亦樂乎。
湊B難過攞金牌
然而，「阿英」不諱言照顧兒子比拿亞運金牌難度更高：「在海上至少我能控制船帆方向，但阿仔還小未懂得表達自己，有時要估他想要甚麼，唔係我能夠控制，所以好有挑戰性，呢方面太太比我叻。」雖然口說辛苦，但「阿英」對着囝囝時，父愛幾時都爆晒棚，從家中每個角落都是囝囝的玩具，連電腦桌面都是囝囝一個月大時的相片，就知全家人都把這位小Baby「錫到燶」！
昨晚「阿英」更抽空逛商場，想給太太揀選一份有心思的聖誕禮物，他笑着說：「要氹她幫我生第二個。」相信很快陳家就會再添成員，陳靖就會多個弟弟或妹妹陪他一起玩了。
陳敬然Profile
主項：滑浪風帆
外號：風之子
生日：12月13日（27歲）
婚姻狀況：已婚（有1子）
亞運戰績：10廣州亞運米氏板金牌
06多哈亞運輕量級米氏板金牌
02釜山亞運輕量級平底板銅牌
圖／文：Carrie