【本報綜合報道】卡塔爾捲入買票風波！阿根廷傳媒日前踢爆卡塔爾曾以七千八百四十萬美元（約六億港元）賄賂該國足總，目的係要確保有足夠票數贏得二○二二年世盃主辦權，不過阿根廷足總已否認其事，並指報道嚴重影響阿根廷嘅國家形象。
早在投票大會未開始前，已有兩名執委成員意圖收取賄款，被國際足協取消投票資格，估唔到依家主辦權塵埃落定，再度爆出買票醜聞。根據阿根廷傳媒報道，卡塔爾知道阿根廷足總正陷入財政困難，曾經出價七千八百四十萬美元，向該國足總主席格隆當拿買票。
格隆當拿在南美洲足協具有一定影響力，卡塔爾希望可以運用佢嘅權力，爭取更多南美國家支持，不過阿根廷足總方面已否認其事，認為今次報道係對佢哋同格隆當拿一種侮辱，並重申佢哋依家財政健全，唔使任何金錢上嘅幫助。