2022世界盃一月踢？
【本報綜合報道】卡塔爾成功取得二○二二世界盃主辦權，但該國在夏天氣溫可高達攝氏五十度，在酷熱天氣底下運動，難免對球員健康帶來威脅，所以國際足協委員碧根鮑華表示，二○二二世盃有可能要改在一或二月舉行。
雖然卡塔爾在申辦書承諾，會花重金去興建有冷氣系統嘅大型場館，以解決炎熱問題，但因訓練場地並未能設有以上功能，所以國際足協技術報告早前亦提出警示，在高溫之下比賽，可能會對球員帶來威脅。碧根鮑華指出，為咗球員着想，必須要搵出解決方法，由於卡塔爾在一至二月期間，平均溫度大約只係廿五度左右，所以有可能將世盃改在冬天進行。
改唔改期有盤開
不過，若然國際足協真係決定實施「冬季世盃」，就會攪亂歐洲各大聯賽賽程，例如英超向來冇歇冬期，一至二月都有比賽，屆時要為世盃讓路將變得非常複雜。對於二○二二決賽周改期一事，博彩公司威廉希爾已開出盤口，七月舉行仍屬大熱1.62倍，至於十二月、一月及二月舉行，都被列為101倍，睇嚟莊家並唔睇好冬季舉行嘅可行性。