香港申辦二○二三年亞運遇到強大阻力，原因係乜？只要睇吓七成中學生支持香港申辦亞運，但政客及升斗市民卻個個喊打喊殺，就知道問題癥結所在，就係一個「錢」字，因為好多香港人都唔願意做蝕本生意。
香港人唯利是圖，乜都要計過度過，喺寸金尺土嘅香港，豪宅以萬蚊呎計算，用嚟興建運動設施本身已唔符合經濟效益，仲話要拎幾百億出嚟，邊個肯制呀？好多人都會問，點解隔籬埠就年年有錢派，我哋就要籌旗畀阿公先？就係呢啲諗法，令香港搞東亞運都要「慳住使」，以一個數千人校運會規格嘅運動場作為田徑主場館，淪為國際笑柄，波男實在好心痛！
香港成日話要搞通識教育，但講來講去都係巧立名目，何謂通識？亞運就係最佳通識課，透過亞運認識奧林匹克精神，了解世界各地文化差異，對青少年成長有莫大裨益，但港人樣樣都講錢，呢啲咁虛無縹緲嘅好處，講嚟都嘥氣！
波男認為，政府想得到市民支持，應該將申辦亞運重新包裝，效法當年「數碼港」咁，將亞運選手村注入地產概念，甚至同「置安心」計劃掛鈎，待亞運結束後，將單位廉價賣畀市民，相信到時市民政黨肯定即時「轉軚」贊成。
波男