征NY前反彈 鷹隊生擒巫師

鷹隊尋日喺感恩節中成功止血，以116比96大勝巫師20分之多，結束三連敗頹勢。不過鷹隊今晚會遇上硬仗作客紐約人，由於紐約人近期氣勢如虹，常規賽已連勝五場，鷹隊想作客贏波並唔容易。（有線165台及now 678周日凌晨2時直播）
鷹隊祖殊史密夫（右）準備跳投。（美聯社圖片）
鷹隊祖殊史密夫（右）準備跳投。（美聯社圖片）

為求挽回頹勢，鷹隊尋日一開賽就強攻續有易建聯缺陣嘅巫師，由於巫師今場有多少「排錯陣」，竟派三名後衞約翰禾爾、軒域治及亞連拿斯一同打正選，但效果明顯欠佳，尤其係軒域治並唔適應小前鋒位置，所以球隊早段已落後鷹隊。打完三節後，鷹隊已經大幅領先26分，令最後一節成為垃圾時間，最終鷹隊輕勝116比96。

狀元禾爾冇球好波

「鷹王」祖莊遜今場攻入全隊最高21分，而祖殊史密夫就貢獻20分及搶得14個籃板，均屬贏波功臣，相反巫師狀元約翰禾爾今場大失準，12次起手僅中3球，只有10分進帳。巫師教練桑達斯賽後就大罵球員似度假多過比賽。

  • 放大圖片

鷹隊贏波後，今晚就要面對紐約人，鷹隊除咗要作客之外，休息時間亦冇對手咁充裕，加上紐約人近期氣勢正盛，連續五場常規賽都贏波，當中仲要有四場係作客，可想而知佢哋嘅狀態幾咁弗，預計紐約人贏波機會較高。

本報綜合報道