【本報綜合報道】狀元技勝一籌！巫師「狀元」約翰禾爾昨日與「榜眼」伊雲端拿所屬嘅76人交手，結果約翰禾爾喺完場前3.5秒射入三個關鍵罰球，令比賽進入加時，最終巫師主場以116比114，兩分之微擊敗76人，今季兩次交鋒均由巫師勝出。
今仗所有人嘅焦點都放喺兩名新人身上，剛傷愈復出嘅約翰禾爾，今場先擔任後備，上半場五投全失，明顯未進入比賽狀態，但當下半場搵番手感之後，即刻帶動成隊波，巫師亦成功大逆轉，喺最多落後17分嘅情況下追成平手。
約翰禾爾今場取得25分及6次助攻，至於「榜眼」伊雲端拿則僅得11分，表面明顯被比下去，其實兩人今季首次交鋒時，形勢亦非常緊湊，當時巫師僅以1分之微擊敗對手，可見兩人均視對方為假想敵，每次碰頭都分外落力！
明日早上巫師將會作客對鷹隊（now 635周五早上9時直播），巫師今季作客仲未贏過，球隊上下均希望食住上場贏波個勢，成功開齋。
至於昨日另一場矚目大戰，湖人主場以98比91擊敗公牛。公牛頭號球星戴歷羅斯今場表現相當落力，取得30分及8次助攻，但依然未能打破未贏過湖人嘅宿命。