省鏡女將逐個捉！
亞運仲有三日就閉幕，真係有啲唔捨得，今屆亞運造就咗好多英雄同明星，當中幾位靚女運動員更成為亞洲傳媒追訪嘅焦點。
孫妍在（南韓）
15歲嘅孫妍在係南韓嘅藝術體操選手，被傳媒評為南韓代表團五大美女之一，雖然只得十五歲，但憑住清新脫俗嘅面孔，明亮嘅眼眸，已俘虜咗一眾宅男嘅心。
梁敏喻（馬來西亞）
馬來西亞「跳水公主」梁敏喻貌似Maggie Q，佢同隊友帕姆格奪得跳水女子雙人十米高台銀牌，被傳媒問佢覺得自己似唔似Maggie Q時，佢話唔覺得似。
丘阿托科（菲律賓）
今年剛滿十六歲嘅丘阿托科，依家仲係一名高中生，雖然佢喺25米運動手槍成績唔理想，但憑住秀麗嘅面孔，仍吸引到傳媒嘅注意！
鄭達萊（南韓）
南韓女泳手鄭達萊奪得今屆亞運200米蛙泳冠軍後，喺泳池中喜極而泣，對住傳媒又經常答非所問，直率嘅性格為佢增添唔少分數，被南韓民眾選為今屆亞運「最可愛明星」。