皇馬「寸王」莫連奴征服英超、稱霸意甲、揚威西甲，其魅力依然令英格蘭球壇緬懷，剛入選英格蘭聯賽領隊協會名人堂，同費格遜、雲格及畢樹比爵士等名帥睇齊，並豪言將來會重返英超。呢位「牙擦主帥」意氣風發，不忘用其三寸不爛之舌論盡球壇，勸喻安察洛堤等炒不如主動走人，對前度球會國米衰落感驚訝，更視西甲國家打吡如無物，其獨特見解再次凸顯「Special One」過人之處。
上季為國際米蘭贏得三冠王，我真係好開心，以球隊根基應該仲可以威多幾年。但前幾日睇報紙，話佢哋自○六年以來首次遭遇聯賽兩連敗，我真係嚇咗一跳。賓尼迪斯又輸？真係不可思議，估唔到國米已落後榜首AC米蘭九分。不過國米失敗並唔係賓尼迪斯嘅錯，喺意甲搵食遠比英超困難。當然我喺英超同意甲一樣得到成功，但我係異數，大家應該體諒同支持賓尼迪斯，唔好攞佢同我比。
皇馬嚟緊聯賽作客巴塞隆拿，傳媒不斷吹噓甚麼西班牙國家打吡，球迷又拗到面紅耳熱。但講真，呢場所謂嘅國家打吡只不過係一場比賽，何必太在意呢？皇馬對巴塞只係西甲三十八輪賽事嘅其中一場，又唔係歐聯淘汰賽，更唔係決定性賽事。
我以往曾經帶領車路士同國際米蘭喺歐聯對過巴塞，對巴塞點踢自然有啲心得。至於講到C朗同埋美斯，我認為佢哋兩個喺唔同比賽，發揮都有唔同，但佢哋都係同級數球員，唔可以武斷話邊個勝一籌。
我莫連奴話晒喺車路士有過一段美好回憶，依家對球隊一舉一動仍非常關心，近排知道領隊安察洛堤隨時烏紗不保，老實講我好明白佢依家處境，做人最緊要有face，與其等炒不如主動辭職，走得更有尊嚴。當○七年為車路士奪得足總盃冠軍時，皇馬已經邀請我過檔，但我拒絕咗，結果四個月後就被炒，所以我根本應該喺捧盃當日選擇離開，情況應該會好啲。
不過安帥似乎唔聽我忠告，話會以成績決定命運，祝佢好運囉！