內線薄弱、缺乏默契、傷患影響，熱火開季以來一直受此三大問題困擾，尋日縱有韋迪傷愈復出，但「閃電俠」根本毫無狀態，全場13次起手僅中1球得3分，另加5次失誤，可謂打出職業生涯最差一仗！其餘兩巨頭勒邦占士及保殊今場亦受韋迪「傳染」頻頻失誤，最終熱火主場以77比93慘負溜馬，輸掉第6場常規賽，成績仲差過上季未組「三巨頭」嘅時候。
上場不敵弱旅灰熊嘅熱火，諗住返回主場，加上有韋迪復出可以挽回面子，殊不知「閃電俠」不但幫唔到手，仲全場累街坊。今場韋迪上陣38分鐘，13次起手僅中1球，罰球線同樣缺乏手感5射中1，命中率慘得7.7％，係韋迪ＮＢＡ生涯以來，起手次數達10次以上嘅命中率新低。
熱火其餘兩大巨頭勒邦占士及保殊亦唔好得去邊，「大帝」雖貢獻25分，但就有6次失誤，而保殊亦出現4次失誤，所以「超級三巨頭」合共交出15次失誤嘅羞恥數據。韋迪賽後承認今場係生涯中最差一仗，但就冇將傷患當作失準藉口。至於為溜馬貢獻20分嘅班頓魯殊就透露，球隊知道韋迪狀態欠佳，所以今場故意畀多啲機會佢起手，結果戰術成功。
熱火輸波後，總成績為8勝6負，表現的確比季前預測差一截。其實熱火上季未組「三巨頭」時，頭14場成績為9勝5負，較今季為佳，所以熱火班波真係仲有排執。由於大前鋒夏士林觸傷左腳至少抖六星期，所以熱火以搵咗今季被山貓放棄嘅中鋒丹比亞，給予佢一紙140萬美元底薪合同，補充內線人手。不過熱火聽朝要作客火併勁敵魔術，球隊狀態咁沉，相信好大機會嘗到今季首次三連敗。（now 635周四早上8時30分直播）
■本報綜合報道