加素破封塵21年完美紀綠
【本報綜合報道】加素完美演出！湖人中鋒加素造出21年來NBA最完美嘅紀錄，昨日對勇士18次起手全部命中，獨取28分！對上一次創此佳績球員係「惡漢」巴克利，但已經係1989年嘅事，球迷足足等咗21年！
18次起手全中
加素今場10投10中，另外罰球亦8射8中，加埋起手18次例不虛發，表現無懈可擊。翻查聯盟紀錄，對上一次能夠投籃10次或以上，罰球投進8球而又全部命中嘅球員，已經係21年前，可見加素呢個紀錄得來不易。湖人憑加素精彩演出，主場以117比89大勝勇士，總成績改寫為12勝2負，排聯盟第三，成績最好係同為11勝1負嘅黃蜂同馬刺。
此外，湖人周三早上將會惡戰公牛，雖然兩隊嘅殿堂級人物魔術莊遜及米高佐敦已退役多年，但由高比拜仁大戰戴歷羅斯一樣有睇頭。戴歷羅斯目前平均得25.2分，僅少過高比仔嘅25.6分，兩位得分高手今場一較高下，肯定成為球迷焦點所在。
戰果放送
速龍 102:101 塞爾特人
帝王 71:75 黃 蜂
活塞 115:110 巫師★
湖人 117:89 勇 士
註：前者主場 ★為加時