2000蚊做Racing Queen 渴市！
每年澳門賽車焦點之一，就係各大贊助商請來一大批Racing Queen到場，鬥騷身材搶鏡博出位，賽事未開始，龍友們已經滿載而歸。不過昨日卻反常地出現「RQ荒」，日薪二千蚊都冇女仔返工，最低工資立法都係時薪廿八蚊啫，唔通女仔們咁都嫌少？
昨日到場嘅賽車女郎人數不多，兩位車胎贊助商女郎早上僅出現一段短時間，「快閃」亮相後已不見蹤影，之後又有飲品贊助商兩位女郎出動派贈品，派完後亦告消失。
屬於車隊嘅女仔實際上只得六人，其中四個屬於一個手機贊助商，分別係Jolin、Isabell、KaKi及阿Wing，呢班女仔均來自香港，部分曾於去年澳門賽車亮相。
索女多job唔易搵
原來做澳門賽車女郎都幾好搵，日薪二千港元，一日工作七小時計，時薪接近三百元，比最低工資時薪廿八元高出十多倍，不過負責安排賽車女郎嘅職員表示：「要搵合適嘅女仔唔容易，因為市場需求大咗，高質素女仔都有好多job，我哋出到日薪二千蚊，都唔係咁易搵到女仔。」
靚女當然渴市，今日賽事開始，預計Racing Queen們將會陸續進場，想睇靚女就要等今日喇！