澳門大賽車炒到甩轆
睇賽車其中一個緊張之處係炒車，炒得愈甘愈刺激！本年度澳門大賽車昨日正式揭幕，練習及排位賽已經炒車炒到飛起，全日共出示八次紅旗，仲有四人送院，幸好並無大礙，而東望洋大賽同F3排位賽都冇時間鬥足，要順延今日再戰。
（無綫翡翠台今午1時15分直播）
昨日先出事係路車排位賽，33號中國車手司徒建忠在松山嶺南彎高速撞欄，碎片四濺令附近四名工作人員受傷，兩人須用擔架抬上白車，另兩人自行上白車送院，幸好經治理後四人均無礙出院。結果路車由澳門車手孫鐵勛取得頭位資格。
張煒安輸0.036秒出局
另一項炒得最甘賽事就係東望洋大賽，由於之前太多意外，賽事順延至黃昏開賽，天色漸暗加上路窄彎急，幾好技術都中招，羅曼諾夫、派奧等高手都撞車收場，甚至連歐陽若曦最大對手靴蘭迪斯亦炒車，賽事四度出示紅旗並要腰斬，今日早上再戰，亦令三級方程式排位賽無法舉行。至於歐陽若曦暫時排第六，衝擊私人車隊爭奪嘅「獨立盃」總冠軍處於有利位置。
至於其餘賽事都能完成，其中格蘭披治電單車大賽，三位英國車手路達、伊斯頓及麥堅尼斯位居三甲，四屆125cc冠軍香港車手張煒安就唔好彩，僅以0.036秒之差未能取得參賽資格，慘被淘汰出局。張煒安入信向賽會請求參賽，但未能成功，今日無緣角逐。張的父親表示，安仔廿九歲才角逐1000cc大賽，起步較遲，更可惜是他外語能力有限，空有技術而未能獲大廠垂青，希望明年做好準備捲土重來。
昨日排位賽前三位
澳門格蘭披治電單車賽
1 路達 （英國）
2 伊斯頓 （英國）
3 麥堅尼斯 （英國）
財神酒店澳門/香港埠際賽
1 盧啟峯 （香港）
2 毛偉立 （澳門）
3 曾善璽 （香港）
澳門路車挑戰賽
1 孫鐵勛 （澳門）
2 織戶學 （日本）
3 谷川達也 （日本）
澳門電訊房車賽
1 潘德俊 （香港）
2 馮文偉 （香港）
3 盧家輝 （香港）
今日主要賽事（早上8時15分展開）
澳門格蘭披治三級方程式大賽 排位賽
FIA世界房車錦標賽—澳門東望洋大賽 排位賽
財神酒店澳門/香港埠際賽 10圈
澳門GT盃 排位賽
澳門電訊房車賽 12圈
澳門格蘭披治三級方程式—選拔賽 10圈
澳門格蘭披治電單車大賽 15圈
太平洋寶馬方程式 排位賽
澳門路車挑戰賽 10圈
黃兆崑澳門直擊