明星賽投票展開 姚明返嚟啦！
ＮＢＡ尋日正式公布二○一一年洛杉磯全明星賽候選球員名單，上季因傷未有入選嘅姚明重返候選名單中，由於西岸星級中鋒唔多，預計「小巨人」將極大機會成為今屆明星賽正選，可惜同鄉易建聯就冇份入圍。
因今屆ＮＢＡ全明星賽在洛杉磯舉行，所以注目度一定較近屆為高，聯盟尋日就公布賽事嘅候選球員名單，一共有120人入選，其中東西岸各有24名前鋒、24名後衞及12名中鋒。今次入圍大戶係湖人及鷹隊，各有六名球員入選，而季初組成「三巨頭」嘅熱火則有四人入選，分別係勒邦占士、韋迪、保殊及查馬斯。至於姚明就會聯同隊友史高拉、布魯克斯及奇雲馬田爭取球迷選票，但除「小巨人」之外，其餘火箭隊友都未打過明星賽。網民可以上ＮＢＡ官網投票東西岸心水陣容，網上截止日期為香港時間明年1月24日。
魔術大炒鳳凰城
賽事方面，魔術尋日共六位球員攻入雙位數字得分，大炒鳳凰城105比89，其中杜域侯活就射入20分及搶得12個籃板，助魔術將戰績改為8勝3負，排於東岸第二，僅次塞爾特人。
賽果放送
溜馬 107:80 快艇
魔術 105:89 太陽
拓荒者 86:83 金塊
註：前者主場