美貌及身材並重嘅禮儀小姐，每次出場都成為賽場上一道風景，但咪以為佢哋係花瓶「得個樣」，經小記連日來觀察，發覺佢哋好有專業精神。好似小記尋日採訪BMX嘅時候陽光普照，氣溫就有成廿幾卅度，但前日採訪「山地興」，氣溫只有十零度，有見及此，我都帶定件外套跟身，以防冷親中招。
專業精神 堅毅不屈
不過，指定要着「行雲流水」制服嘅禮儀小姐，就冇得加衫嘞，而且無時無刻都要保持笑容，又捧住好重手嘅獎牌，真係少啲忍耐力都唔掂。前日龍舟賽就有一位禮儀小姐暈倒，相信係暴曬下體力透支，我聽聞呢位小姐其實賽前已經唔舒服，但為咗珍惜每次上場嘅機會，都堅持撐落去，呢啲咪叫專業囉！