巴拉圭今次訪港，最受矚目當然係頭號球星辛達告魯斯，呢位踢過拜仁慕尼黑、布力般流浪同曼城嘅球星，去年轉會曼城後未受重用，抖仲多過踢。辛達告魯斯尋日喺記者會上透露，雖然好鍾意曼城，但為尋求更多上陣機會，將會喺明年一月離開曼城。
現年二十九歲嘅辛達告魯斯，今季僅替曼城喺英聯盃正選上陣一次，另外喺上周六對伯明翰則後備入替，今季首次亮相英超。對於經常坐冷板櫈，辛達告魯斯表示已搵緊班落，如果可以嘅話希望留喺歐洲發展。
巴拉圭領隊馬天奴則表示，今次來港踢熱身賽係為明年美洲國家盃作好準備：「南美球隊喺今年世界盃表現出色，相信今屆美洲國家盃競爭會好大，所以我哋喺世界盃後，先後到澳洲、日本同中國踢熱身賽，保持比賽狀態。」