小牛「黃金5分鐘」破黃蜂不敗身
【本報綜合報道】經過尋日嘅賽事後，今季NBA終於冇晒長勝之師！黃蜂尋日作客遇上西岸勁敵小牛，結果尾段大意失荊州，第四節內一度5分鐘未有得分，結果小牛把握機會，最終以98比95反敗為勝，打破黃蜂今季不敗神話。
黃蜂喺賽前寫下開季八連勝佳績，刷新球會史上最佳開局紀錄，今場開賽後亦保持勇態，三節過後有7分領先優勢。不過黃蜂喺第四節突然失準，當史杜積高域喺賽事剩餘6分鐘時射入一記三分球，繼續領先7分底下，及後5分鐘竟然1分都未攞過！結果小牛就係把握呢「黃金5分鐘」去瘋狂追分，最終反勝98比95。
末段犯錯基斯保羅認衰
黃蜂初嘗敗績，「蜂王」基斯保羅就承認自己在賽事中犯錯，至於小牛方面，魯域斯基繼續有上佳演出，貢獻25分及搶得10個籃板。雖然黃蜂被破不敗身，但球隊都唔使太灰心，皆因近三季NBA中，在常規賽中最後嘗敗績嘅球隊都能夠打入總決賽，相信此數據會為黃蜂注入唔少力量。再者，兩軍聽朝會再度對賽，今次輪到黃蜂主場，大可以趁主場之利下報回一箭之仇。（now635周四早上9時直播）