太陽3分雨射死湖人

近年一直被湖人食住嘅鳳凰城，今場矢志報回上季西岸決賽出局之仇，鳳凰城開賽後已手感奇佳，尤其係三分球連番命中，令球隊在下半場一直處於領先狀況，湖人在完場前剩餘11秒時曾一度追貼至只差4分，但因拿殊及後射入罰球鎖定勝局，最終以121比116擊敗湖人，終止作客湖人七連敗劣績。

22個3分波史上第2

鳳凰城今場合共射入咗22球三分波，排於NBA史上第二，而第一係魔術喺上年一月時射入23個。「入樽王」積遜李察遜今場10次起手三分入7個，攻入全場最高35分，而陶告魯就7射三分中5，中鋒菲爾亦射入4個三分球。鳳凰城教練根特利賽後就話：「今晚賽事很有趣，感覺就像籃框變大，球員起手都能命中！」

其實湖人主將高比拜仁表現唔算差，個人攻入25分及交出14次助攻，不過賽事去到最後一節時，高比仔就被攝影師影到與教練積遜爭吵，當時高比正在比賽，積遜卻突然喊暫停，明顯惹來高比不滿。兩人喺球隊暫停後仲嘈到面紅耳赤，希望唔會影響兩師徒嘅關係啦。

「魔獸」送樓當掩口費

另外，魔術中鋒杜域侯活終於解決了與前女友嘅糾紛，利用買樓塞住女方把口。幫「魔獸」誕下第一名孩子嘅前女友里德經常爆侯活私隱，搞到後者一度出律師信告佢。但杜域侯活早前已斥資購買一所3,500平方英尺嘅豪宅畀里德，擺明當掩口費。

賽果放送

鷹隊 111:105 木狼

帝王 94:100 活塞

雷霆 104:117 馬刺

紐約人 96:104 火箭

湖人 116:121 太陽

註：前者主場