「你有壓力、我都有壓力，你仲乜挑釁我呀？」小記尋日一早已經趕到沙灘排球場地，捧兩位老友江卓儀同謝穎紅場，結果兩位「美少女」總算冇令我失望，擊敗南韓贏出第一場分組賽，有個好開始。
小記同一眾香港行家，賽後隨即落場採訪二人，殊不知一名負責電視媒體採訪嘅外籍職員竟然出面阻止，一輪大道理咁話唔畀手持攝影記者證嘅記者採訪，搞到眾人當堂「O晒嘴」。好啦！你話唔畀都算啦，我哋已經決定讓步，叫「孖妹」離開場地，離開呢位外籍職員管轄範圍內做採訪，點知佢就咄咄逼人，追到出嚟繼續阻止，擺到明誓不罷休！
對於佢呢種欺人太甚嘅態度，完完全全係 「尋釁滋事」， 一眾行家當然忍無可忍據理力爭同佢理論，點知佢惡人先告狀，喺度喊打喊殺，話要向賽會撤銷我哋嘅記者證件，以後冇得再採訪。最終要霍啟剛出面先能夠平息事件。
其實小記認為，大家都係做嘢啫，你有職責我哋明白，但我哋傳媒同樣要搵料畀讀者o架嘛，何必咄咄逼人先？