姚明又傷！易建聯贏中國打吡
【本報綜合報道】「小巨人」姚明又倒下！尋日NBA上演第五次「姚易中國打吡」，可惜兩人尚未交鋒，姚明已因傷退場，無疑令華人球迷大為失望。不過，以後備身份為巫師上陣嘅易建聯就打出今季代表作，加上狀元爺約翰禾爾貢獻「三雙」，最終協助巫師贏98比91，阿聯加盟NBA以來首次在「中國打吡」贏波！
火箭軍醫早前正計劃取消姚明嘅「24分鐘時限令」，殊不知「小巨人」咁快就唔爭氣受傷。只係開賽6分鐘，姚明就因一次搶板落地誤踩隊友史高拉而拉傷左足，要由軍醫陪同返入更衣室，此後都未有再上場。據了解，姚明今次係拉傷左腿肌腱，位置頗接近舊患處足踝，而姚明今日作詳盡檢查後至知要休息幾耐，但「小巨人」已示意冇傷及骨骼。
微博祝姚明早日康復
姚明傷出後，另一中國球手易建聯就上場，阿聯打出加盟巫師後最佳一戰，上陣29分鐘攻入13分、7個籃板及4次封阻，全部數據均屬個人今季新高，與約翰禾爾合力助巫師以98比91擊敗火箭。興奮嘅阿聯賽後即更新個人微博：「今晚很難忘，不是因為贏球，而是我來NBA三年多第一次贏火箭，算是個紀錄吧！遺憾姚明因傷退賽，希望他無大礙早日康復！」