今屆亞運喺廣州舉辦，好多人都錯覺以為：廣州好近啫，成日都上去，熟晒啦！我自問做咗記者咁多年，經常出差返內地，去廣州採訪係濕濕碎，但其實採訪廣州亞運一啲都唔簡單，由南到北兩個地點工作，一日就要二百公里車程！
香港武術隊嘅採訪地點係南沙，呢個地方係廣州最南部嘅地方之一，由傳媒中心出發要三十公里車程，大概屯門公路出九龍咁遠，好嘞，搞完一大輪，又要坐三十公里車返傳媒中心。跟住再去廣州北部嘅花都睇足球，花都附近就係新機場，距離市區真係「冇雷公」咁遠，由傳媒中心出發到花都體育場，要七十公里，睇完波再返傳媒中心，來回就係一百四十公里嘞。
好簡單咁完成兩個採訪工作，一日之內嘅行程總里數竟然係二百公里！即時令我諗起航空公司嗰啲飛行里數計分優惠，如果亞運都有得計里數，咁就發達啦！