「我想做番好人！」《無間道》劉健明督察為重回正路無所不用其極；朗尼要洗心革面做個好老公，亦須接受無數狐狸精嚴峻挑戰。近期該曼聯前鋒遠赴美國波特蘭醫腳，呢座城市滿布紅燈區，「脂粉客」朗尼大駕光臨，早已掀起一陣騷動，不但當地大小名妓做好出擊準備，想勾引呢位恩客光顧，就連其他城市性工作者，亦於網上熱烈討論，好多更不惜穿州過省，務求要得到朗尼嘅「寵幸」！
朗尼剛成全球最高人工足球員，周薪高達廿五萬鎊，最重要係佢鹹濕到震，「召妓史」成本電話簿咁厚，嫖老妓已經夠衰，早前趁老婆麥露蓮大肚，竟然一擲萬金同兩名妓女大玩3P性遊戲，事件曝光後更帶挈妓女湯普森一夜成為英格蘭家傳戶曉嘅「名妓」，賺個盆滿缽滿。
前人有辦你睇，後人自然當朗尼係寶，邊個黐到埋去就邊個發達。目前朗尼「身陷胭脂虎穴」於波特蘭療傷，之前已有傳當地妓女蠢蠢欲動，準備接朗尼呢名大客，一舉揚名「淫界」；但原來美國其他城市嘅同業，亦睇中呢舊「賤格肥肉」，紛紛上網打探朗尼於波特蘭行蹤，打算主動出擊兜生意。
喺美國一個著名夜遊討論區，唔少姊妹開宗明義留言，其中一位謂：「朗尼個腦隨時隨地都諗到性，我哋有責任為佢紓解一下，因為佢實在太疊水喇，哈哈！」
呢個Post無論瀏覽量同留言量都超高，當中好多都話已買定機票去猶他州碰碰運氣，話只要做成佢一單生意，以後就唔使憂。朗尼呢個「假唐僧」面對眾多妖孽，根本冇定力去對抗，麥露蓮都係快啲化身孫悟空，貼身目及實你個爛滾老公先掂呀！