削髮魯域斯基絕殺綠軍
【本報綜合報道】一頭長金髮向來係魯域斯基嘅標記，但呢位小牛主將日前削髮明志，尋日以一個剷青新Look迎戰「綠軍」塞爾特人，結果果然轉運，魯域斯基射入「絕殺一球」，協助主場嘅小牛以89比87險勝塞爾特人，並終止「綠軍」5連勝。
其實塞爾特人今場算輸得好唔抵，皆因比賽剩餘最後兩分鐘時，「綠軍」仍有5分優勢，但擁有主場之利嘅小牛，好快已憑魯域斯基嘅上籃及泰利嘅三分球追成平手。其後魯域斯基更在剩餘17秒時，接應傑特傳送射入一記中距離跳投，協助球隊在尾段反超前。落後嘅「綠軍」之後有朗度及加納特相繼射失，錯過追平機會，最終小牛險勝兩分。
小牛終止塞爾特人5連勝
全場攻入25分及搶得7個籃板嘅魯域斯基賽後表示：「早就料到傑特會傳球畀我，當時格連戴維斯在防守我，但我有足夠能力喺佢面前取分！」至於隊友泰利亦大讚呢位頭號功臣：「佢剪咗頭髮的確好棒，簡直就好似回到當年攞MVP嘅狀態！」
塞爾特人輸波後，5連勝告終，現時戰績為6勝2負，至於小牛就贏得第4場勝仗，總成績為4勝2負。