熱火靠韋迪贏76人
【本報綜合報道】揭幕戰慘遭滑鐵盧嘅熱火，昨日終於開齋，作客以97比87擊敗76人。作為熱火老大哥嘅「閃電俠」韋迪，昨仗光芒盡蓋「大帝」勒邦占士，而「大帝」則淪為「過街老鼠」，畀主場球迷狂噓，仲揶揄佢係「說謊的皇帝」！
熱火今季加入「大帝」及保殊後，好多人都擔心「三巨頭」戰術能否取得平衡，但韋迪向外界證明，即使佢一個人都可撐起隊波，昨日韋迪獨取30分、7個籃板、4次助攻同3次偷波，表現光芒四射，但佢依然唔太滿意自己演出。
大帝被噓未驚過
韋迪表示：「今季陣容變化咁大，球隊仲未進入狀態，我見自己手感唔錯，所以爭取較多起手機會。」保殊同勒邦占士分別貢獻15及16分，但兩人造就咗唔少機會畀占士鍾斯，鍾斯共射入6個三分波。
至於「大帝」因轉投熱火而成為球迷公敵，但佢話唔介意成為被針對嘅目標：「我職業生涯都受過咁嘅對待，球迷噓你，係代表佢哋鍾意你嘅打波方式。」