鳳凰城跌Watt 湖人可連捷
明日NBA連場大戰，直播波湖人作客對鳳凰城太陽，湖人有力繼揭幕戰贏火箭後再下一城！季前賽一直冇乜上陣嘅高比拜仁，上仗打咗大半場感覺良好，佢話狀態已返晒嚟，對住今季跌晒Watt嘅鳳凰城，相信湖人又係時候Show Time！（now 635周六早上10時30分直播）
上季尾受傷患困擾嘅高比仔，傷勢一直未好番晒，季前賽都係就住就住打，投射命中率僅得28.2%，而三分球命中率更得17%，不過經過揭幕戰上陣37分鐘並取得27分後，高比仔話自己已經Ready，今場打幾耐都得。
另邊廂嘅鳳凰城今季冇咗A史杜迪米亞後戰鬥力大減，上場畀拓荒者輕取，主將拿殊打到相當冇癮，佢承認鳳凰城今季欠缺競爭力，想打入季後賽難過登天。從上仗所見，無論係老將格蘭希爾或新加盟嘅陶告魯，落到場表現均有心無力，對住如日方中嘅湖人，睇怕都係輸少當贏！
雷霆恰到活塞
同日另一場活塞對雷霆（now 678及有線165台周六早上8時直播），雷霆射手杜蘭特狀態大勇，上仗獨取30分，帶領雷霆砌低公牛。雷霆上季三次交手都贏活塞，今場大有格食格味道！