○九年東岸冠軍魔術今季陣容冇乜變動，但依然係爭標熱門之一，呢隊波勝在戰術同架構簡單，以「魔獸」杜域侯活為核心，配合外線嘅「加拿大飛人」卡特，打法唔華麗卻實際，絕對唔可以忽視。
講到當今NBA首席中鋒，相信杜域侯活當之無愧，呢位「超人」除咗籃板同封阻了得，近年喺進攻方面都有下苦功，無論投射命中率同步法，都較初出道時有明顯進步。
不過，單靠杜域侯活係唔足以稱霸NBA，魔術嘅弱點係得分點唔夠分散，上季平均得16.6分嘅「過氣飛人」卡特，表現略嫌飄忽，狀態好嘅時候着晒火，但差嘅時候亦可以冇晒影，大大加重其他隊友嘅負擔。
幸好球隊補充咗熱火來投嘅昆田李察遜，呢位「搖擺人」無論外投同爆籃能力都唔錯，如果能夠迅速融入球隊嘅話，相信可提升魔術嘅整體戰鬥力。