塞爾特人上季喺一致看淡下，淘汰騎士同魔術殺入總決賽，令好多球迷大跌眼鏡。今季「綠軍」除咗保留「三巨頭」加納特、雷阿倫同皮雅斯外，更羅致咗「巨無霸」奧尼爾同謝美奧尼爾，呢個咪係七、八年前嘅全明星陣容？
塞爾特人作為NBA奪標次數最多嘅傳統班霸，今季嘅陣容真係夠晒懷舊，但正所謂水能載舟亦能覆舟，塞爾特人有嘅係經驗，不過最輸蝕嘅地方就係朝氣同活力，睇教練李華士嘅口氣，常規賽都唔使預佢哋搏得太盡，好似上季咁，留番啲力喺季後賽搏殺好過。
其實李華士都明白到，以塞爾特人呢個嚴重老化嘅陣容，要同湖人、熱火爭一日之長短困難重重，所以綠軍喺戰術上避重就輕，盡量將進攻焦點放喺控衞朗度身上，呢位二十四歲後生仔漸具大將之風，今季如果有料到嘅話，塞爾特人足以擊敗世上任何球隊。