熱火今夏除組成「超級三巨頭」之外，另一個重要收購就係簽入白人前鋒米克米拿，只可惜呢位前美國隊成員於上周中一次訓練中弄傷右手拇指，尋日完成手術後預計要長抖三個月，可算係熱火開咧前最大打擊。
唔知熱火今季係咪仲未拜神，自季前賽開打後，主力球員就輪住傷，其中薪酬達五年二千五百萬美元，充當球隊今季第六人嘅米克米拿，就在操練時意外重創右拇指，經手術後估計要養傷至明年一月先能復出。
基於板櫈深度不足，據悉熱火已敲定人選代米克米拿，就係現時未有班落嘅前小牛老將三十五歲嘅史達侯斯，預計雙方將於日內簽約。另一方面，一直在芝加哥處理兒子撫養權嘅韋迪，日前已返回邁阿密預備新賽季，其傷患問題亦已好轉，預計揭幕戰將會復出。當問到韋迪今季聖誕大戰將決戰湖人嘅時候，「閃電俠」就估計會成為今季最高收視率嘅賽事，而美國《CNBC》亦指出，呢場聖誕大戰屬今季常規賽最高票價，平均一張波飛要893美元（約7,000港元）。