勒邦占士、韋迪、保殊，三位最當時得令嘅球星走在一起，無疑屬今季NBA最大看點。有傳媒就將熱火評為自九十年代公牛王朝後，史上最強嘅NBA球隊，甚至作出精密數據分析，推測熱火能否打破95/96球季，公牛寫下嘅常規賽最佳成績72勝10負，可見熱火確令人有着無限憧憬，今日就先同大家檢閱東岸新季形勢。
同屬「黃金一代」嘅勒邦占士、韋迪及保殊，今夏終於各自減薪，為總冠軍而走在一起。「三巨頭」均已征戰NBA七個球季，論經驗毋須懷疑，而三人亦早已在「夢幻隊」當過隊友，○八年更一同領美國奪得京奧金牌，當時「大帝」就甘願充當「二哥」，讓韋迪成為「夢八」得分王，兩人似乎早已有默契，唔會為個人風頭而影響球隊，再者兩人friend過打band，產生不和或爭風呷醋嘅機會甚低。
至於「超級三巨頭」最大優勢，係三人正值壯年，「大帝」僅得廿五歲、保殊廿六，而最老嘅韋迪都只係廿八歲，相比起今季任何一支爭標分子嘅主力團都要年輕！就算與九六年最強公牛比較，「鐵三角」米高佐敦、柏賓及洛文當年均已年過三十，無疑「熱火三巨頭」相對更具活力，體格及體能亦更為優勝。
不過，創立用方程式推斷球員效能嘅NBA數據分析專家John Hollinger，季前就推斷熱火今季未能追平最強公牛嘅72勝。Hollinger為熱火各球員作出分析後，得出熱火在今季常規賽只能獲取68勝14負，與史上最佳戰績仍有一段距離，但其實68勝已足以令熱火稱霸常規賽。
或許熱火除「三巨頭」之外，其餘位置仍有一定不足，就好似中鋒祖爾安東尼，身高僅得6呎9吋，若然遇上「魔獸」杜域侯活或者湖人「雙塔」拜林、加素，肯定會大為輸蝕。此外控衞查馬斯速度快但防守力欠佳，比較起當年公牛最佳綠葉朗夏柏的確差一截，所以「熱火三巨頭」毫無疑問要比米高佐敦、柏賓及洛文多做更多，才可以創立新王朝。