期待、雀躍、興奮，唔單止球迷開心，前香港足球先生山度士「山Sir」一樣咁高興，車路士落實明年訪港，而佢身為車路士足球學校（香港）總監，未來幾個月大把嘢搞，例如準備安排車仔去位於樂富以車路士主色設計嘅「藍球場」練波，仲諗住搵杜奧巴幫手賣旗！
車路士明年安排亞洲之旅，先去吉隆坡、第二站曼谷，依家終於落實嚟香港，山度士笑說：「自從去年協議合作後，我哋已經係車路士一分子，樂富個『藍球場』由車仔授權，車路士訪港，佢哋當然會去。」
山Sir又謂，車路士一直熱衷慈善工作，佢哋喺英國都經常派球員探訪社區，所以球隊今次來港，希望可以安排球星如杜奧巴、艾辛幫手賣旗，相信效果會幾好。