港隊教練：要攞金牌！

望決賽贏日本報仇

近年欖總青訓搞得出色，不斷有新人加入，部分主力更成為職業球員，例如路雲及韋馬克正喺日本頂級聯賽打拚，係征戰亞運主力，而港隊備戰亦唔馬虎，早前去過上海，月底亦會遠赴馬來西亞比賽。

不過，要數港隊爭金最大籌碼，就要靠晒老謀深算嘅教練戴里斯，原來佢已有全盤大計，力爭金牌：「港隊與日本同組，出線後只要走線避開對方，相信港隊有能力殺入決賽，到時再報去年東亞運決賽一敗之仇。」

戴里斯又謂，香港欖球氣氛極佳，十月卅日大球場將上演「比迪素盃」，由兩支世界頂級勁旅新西蘭與澳洲對壘，他睇好澳洲可以取勝，而這場世紀大戰在港舉行，亦對港隊起着刺激作用，有利備戰亞運。