高比NBA打工皇帝
細個嘅時候，阿媽成日都話讀多啲書先會發達，計我話打多啲波一樣得！新一季NBA就有多達63位球員，領取超過一千萬美元（約7,800萬港元）年薪，成為真正嘅千萬富翁。其中上季季後賽MVP高比拜仁躍升成為NBA打工皇帝，波糧達到2,480萬美元（約1億9,340萬港元），足足比「大帝」勒邦占士搵多一千萬美元！而佢亦係今季唯一薪酬達二千萬美元嘅NBA球員，地位無人能及。
雖然眾多NBA球會近年負債纍纍，但球員係球會嘅生財工具，所以人工依然唔慳得，今季NBA就有多達63位球員，年薪達千萬美元，其中佔最多千萬富翁嘅位置，係大前鋒同得分後衞，分別有16位「千萬先生」。至於最少富翁嘅位置，竟然係被譽為球場上領袖嘅控球後衞，全聯盟只得六人年薪過千萬，足證高佬始終都係值錢啲。
姚明出得少賺最多
講到今季嘅打工皇帝，就由高比拜仁取代麥基迪榮登，呢位湖人領袖今季將會領取2,480萬美元年薪，較第二位嘅魔術前鋒劉易斯多500多萬美元，若然與同級嘅勒邦占士比較，占士只賺1,450萬美元，高比已較「大帝」多賺超過一千萬美元，單計年薪已先勝一仗。
其實年薪高過勒邦占士嘅球員，今季大有人在，單係同屬小前鋒位置，已經有基里蘭高及安東尼騎過「大帝」，當中「毒瘤」基里蘭高年賺1,782萬美元，能夠排在全聯盟薪酬榜第六位，都算無恥。但占士之所以低薪，全因佢自願減薪投熱火，組成「新三巨頭」。
至於超級富豪姚明，人工繼續高企，今季將賺取1,768萬美元，力壓「魔獸」杜域侯活成為最賺錢中鋒！不過姚明今季已被軍醫規定每場只能出場24分鐘，所以對比平均每場出40分鐘以上嘅高比仔嚟講，「小巨人」出得少賺得多，佢先係真正嘅打工皇帝！