@17 LuLu Talk、傾 w/U

記：記者　L：LuLu

記：自從你成為「Fit Baby」為大埔打氣之後，好多fans都想了解你多啲，依家就畀機會你去介紹吓自己！

L：大家好呀！我叫LuLu Tung，今年17歲，啱啱F.5畢業後去咗喺屯門嘅香港酒店旅遊學院讀酒店旅遊高級文憑課程。性格方面，我會形容自己係傻傻哋、樂觀、好動、親切、平易近人、天生熱情咁啦……好容易就同人做到朋友；而自己平時最鍾意係瞓覺同埋跑步，因為可以紓緩壓力，又可以畀自己冷靜吓諗吓嘢。其實我細個時好容易病o架，成日出入醫院，但自從多咗運動之後，病痛少咗又Fit咗！

記：依家你喺網絡上紅咗，又有人幫你整Fans Club同埋多咗人add你，點睇先？

L：我諗係又驚又喜啦！多人add我當然開心，因為證明咗我開始受注目；但又怕add我嘅人有不軌企圖，又驚人哋用有色眼鏡望我，真係好矛盾！其實最初喺Forum見到一啲對我負面評論，真係好唔開心，但係學班老友開解我話齋，依家Forum有八、九成都係正面、只有一成係負面已經好好。即係話有九成人都想我開心，自己又何必要為嗰一成而嬲呢？咁豈不是好蠢！

記：你做咗幾場賽事啦啦隊，對大埔呢支球隊有乜感覺？

L：其實我以前係「足球白癡」，只係睇過幾場世界盃，甚至唔知香港係有足球聯賽。但自從被委任成為大埔嘅足球大使之後，我就開始惡補足球知識，仲睇咗幾場大埔嘅比賽，發覺原來喺現場睇波真係好開心，氣氛一流，老實講我依家有少少愛上咗足球！

記：咁喺大埔隊入面，你對邊個球員嘅印象特別深呢？

L：梗係安杜啦！仲記得喺第一次記者會上，我被安排同佢合照，但安杜竟然唔敢搭我膊頭，只係用手指掂住我膊頭，原來外國人都會咁怕醜，真係好意外！另外聽班球員講，隊長陳旭智同埋安基斯都好高學歷，安基斯仲要係律師嚟添！但為咗踢波竟然會放棄高薪厚祿，同啲人成日話「踢波無前途」啱啱相反。

記：對於球隊同自己嘅未來，你有啲乜嘢抱負？

L：我仲讀緊書，依家做Part Time Model都只係想攞經驗同識多啲人，所以都仲未諗過將來做啲乜！不過，我依家做「Fit Baby」除咗想多啲人為大埔打氣之外，亦可以幫Fitboxx做推廣同拍廣告，咁樣大家就可以透過我，嚟認識更多健身器械及知識，意識到做運動嘅需要，令香港人可以更健康！

董嘉儀 LuLu

學校：香港酒店旅遊學院

年齡：17歲

身高：1米60

體重：41公斤

運動強項：跑步

圖、文：司徒子文

場地提供：Fitboxx