內地傳媒近日爆出劉翔嘅銀行存款有2億人仔（約2.3億港元），不過另一巨星姚明就犀利得多，佢嘅身家近期暴漲至7億美元（約54.3億港元），足足係劉翔嘅23.6倍。
籃球同田徑各有領域，兩者好難比較，劉翔同姚明都係內地體壇巨星，論成就，劉翔當紅時期曾經集奧運、世錦賽同世界紀錄於一身，當然勁過姚明，但可惜有名冇利搵錢唔多，姚明就唔同，佢喺NBA搵真錢，淨係張球會合約都億億聲！佢兩個近年都受腳傷困擾，不過遭遇就好唔同，姚明養傷期間結婚生女，廣告繼續接，亦好熱心慈善，人氣一直Keep住，反觀劉翔就唔同，幾乎係「腳」停口停，傷愈復出後成績下滑，廣告商更陸續離開。
姚明嘅搵錢優勢其實仲有好多，呢幾年佢食晒中美兩大市場，固然豬籠入水，而姚明嘅幕後團隊亦夠醒，識得錢搵錢，包括入股音樂網站、內地籃球隊、連鎖健身室，仲投身股市，其中一隻科技股兩年內勁升九十倍，令姚明又做老闆又做股神。
至於劉翔就冇咁好撈，佢身為國寶級運動員，受國家嚴格監控，根本冇時間搞生意，拍廣告亦有限制，賺咗錢仲要同上級對分，最弊係隻腳明明未完全好番，為搵食都要頂硬上出嚟跑，佢嗰2億人仔真係辛苦錢嚟架！
波男