港中學生手球隊亞洲第二唔易做！
「阿二」真係唔易做！香港學界手球代表隊上個禮拜去咗澳門，出戰「亞洲中學生手球（男子）錦標賽」，雖然港隊對住唔少亞洲強隊，但憑藉就讀元朗公立中學嘅龍門葉冠英「卡斯拿斯上身」屢救險球，終於幫到港隊「爆冷」擊敗泰國、印度等勁旅，贏得亞軍做「亞洲第二」，真係一個意外收穫！
誠如教練龐耀榮賽前分析形勢所言：「今次參加球隊之中，伊朗實在太勁，對佢哋就輸硬，而東道主澳門又實在太弱就贏硬佢哋，喺冠軍冇得爭同唔使驚包尾之下，點樣攞到亞軍先係港隊目標。」
葉冠英屢救險球大功臣
雖然港隊實力上唔及泰國、印度，但勝在鬥心夠同埋有個「鋼龍」葉冠英守門口，喺頭兩場就係靠呢位「大港手」多次擋出泰國同印度嘅必入球，終於連贏兩場完成目標。即使最後以29比56大敗畀伊朗，但仍無阻港隊奪得亞軍，真係恭喜晒！
對於今次比賽所得所學，龐Sir就話：「呢班波得五個係港青成員，其餘都係未見過世面，但打出嚟嘅成績同表現絕對唔曳，證明香港手球界，掂嘅大有人在！另外，睇番呢班小朋友嘅表現，就令我對下年四月舉行嘅港澳埠際賽充滿信心，港隊能夠衞冕嘅機會都好高！」
亞洲中學生手球錦標賽
冠軍伊朗
亞軍香港
季軍泰國
港隊今屆戰果
勝泰國31:30
勝印度31:28
負伊朗29:56
勝澳門35:26
註：賽事採用單循環制