2010-2011學界體壇連環鬥 7星炮製大事典

精英乒賽再搶閘

雖然開咗學只係幾個禮拜，各校都密鑼緊鼓咁備戰新賽季，但全港乒乓球精英賽就一如以往搶閘開打！上屆帶領港青基信書院作「零的突破」，贏得荃離區學界冠軍嘅港青成員毛熙嬋，將迎戰佢學界生涯最後一次精英賽，熙嬋話：「依家啲『後浪』真係好勁，要贏班『小妹妹』真係好困難，但咁樣反而令自己壓力減低，盡全力打好每一場賽事嚟作結束，就會無憾！」

23/9 全港乒乓球精英賽

本月之星 毛熙嬋（港青基信書院）2009年全中運香港學界女乒隊隊長

D1泳賽拔萃望Encore

今個學年第一場神級戰役、港九區Division 1游泳賽將會喺十月十四日爆發！呢個泳賽嘅熱鬧程度，比起本港任何一個錦標賽仲要激，至尊地位無可代替！上屆拔萃男、女書院分別以「Grand Slam」姿態達致完美勝利，今屆當然想Encore。將代表香港出戰廣州亞運嘅男拔萃隊長林政達就話：「我哋喺團體總錦標已連續贏咗十七年，當然唔想喺自己做隊長嗰年斷纜而成為千古罪人，所以我會搏到盡！」

1/10，3/10 全港乒乓球精英賽

14/10，22/10 港九區D1游泳賽

25/10 港九區D1越野賽

本月之星 林政達（拔萃男書院） 2010年廣州亞運香港游泳代表

協恩女籃誰與爭鋒

要數十一月最大型賽事，當然係喺修頓室內場舉行嘅九龍區籃球決賽，每次各校fans都會坐爆二千座位，氣氛之熱烈絕對係數一數二！協恩中學喺女籃界可以話係毫無對手，上屆除咗橫掃九龍區校際賽、精英賽、Panasonic邀請賽及馬拉松籃球賽，完成歷史性「四大滿貫」，埋單一計佢哋呢兩年嘅連勝紀錄已高達六十場，作為隊長嘅施萍萍當然功不可沒！佢就希望球隊可以繼續贏落去，令協恩傳奇可以延續！

6/11，7/11 全港羽毛球精英賽

26/11，28/11 九龍區籃球決賽

28/11 全港羽毛球精英賽

本月之星 施萍萍（協恩中學）2010年中銀紫荊盃女籃傑出運動員

籃排精英賽孖住上

每逢十二月，都係學界賽高峰期，籃球同排球嘅精英賽亦會霸晒啲學生整個聖誕假期！就讀新法書院嘅港隊女排代表劉嘉敏，上年就喺呢段期間收到最好嘅聖誕禮物，就係幫學校創造歷史，攞到全港精英賽亞軍。呢位中七學生就話今年係佢最後一年參加學界賽，希望可以喺畢業前贏到精英賽，嘗試吓「全港學界一姐」滋味！

3/12 港島區籃球決賽

4/12，5/12 港九區劍擊賽

5/12 全港羽毛球精英

20/12，21/12，22/12，23/12，24/12 全港籃球精英賽

27/12，28/12，29/12，30/12，31/12 全港排球精英賽

本月之星 劉嘉敏（新法書院）09年東亞運香港女排代表

手球精英賽英華反擊戰

踏入2011年，首個大賽當然係全港手球精英賽！英華書院喺上屆決賽先畀石籬天主教中學打破金身，仲斷埋「三連霸霸業」，隊長李致成話今屆絕對唔可以歷史重演：「雖然上屆喺精英賽輸咗，但都唔算係壞事，因為咁樣可以令到經常贏波嘅我哋可以重新檢視自己弱點，從而『升呢』。相信上次所交嘅『學費』，可以令我哋將『全港最強』牌匾，再次帶番英華。」

16/1，22/1，23/1，29/1，30/1 全港手球精英賽

本月之星 李致成（英華書院）2010年亞洲學界手球賽香港隊隊長

足球精英賽譚李麗芬擺擂台

港青隊長梁冠聰喺上屆大放異彩，帶領中華基督教會譚李麗芬紀念中學取得創校以來，首個全港足球精英賽錦標。今季佢哋肩負衞冕重任，誓要再創奇迹：「我知道有好多勁旅都對呢個全港冠軍虎視眈眈，好似英華同董之英都有好多甲組腳在陣，但譚李麗芬一向都係贏團隊精神，即使對手有幾多甲組腳都唔會怕佢哋！」

13/2，20/2，27/2全港足球精英賽

本月之星 梁冠聰（中華基督教會譚李麗芬紀念中學）2010年全港足球精英賽MVP

D1田徑賽女拔爭五連霸

嚟到三月份嘅壓軸大戰，港九區D1田徑賽亦隆重上演！衞冕女子組團體總冠軍嘅拔萃女書院，雖有港隊「女飛人」梁巧詩與「大力士」胡泳彤離隊，但仍有東亞運接力賽獎牌得主許文玲，以及「氣袋」三項鐵人許煒森壓陣，力爭「五連霸」嘅阻力相信不大！

2/3 港九區D1田徑賽

3/3，6/3全港足球精英賽

8/3，11/ 3 港九區D1田徑賽

25/3，26/3 埠際羽毛球賽

本月之星 許煒森（拔萃女書院）2010年青年奧運香港三項鐵人代表

圖、文：司徒子文