國籃收拾心情直指亞運金牌

中國今場對勁敵立陶宛曾喺首節大幅領先，加上最後關頭亦曾拉近至只有5分之差，最終以67比78落敗，所以鄧華德已對表現感到滿意，唯一遺憾係防守上依然唔夠緊密，太容易讓對手取分。鄧華德指現時最重要係為十一月廣州亞運做好準備，目標直指金牌。

夢九今鬥俄羅斯

至於世錦賽嘅最後一場16強賽事，阿根廷憑史高拉大爆發，個人20次起手入14球，轟入37分及搶得9個籃板，帶領阿根廷以93比89擊敗南美宿敵巴西。阿根廷其實贏得好驚險，去到賽事剩餘1分多鐘時，一度被巴西追貼至只差1分，幸好史高拉連番射入關鍵波，先至保住勝局。

今晚嘅8強賽事，美國「夢九」追擊俄羅斯，兩軍對上一次正式對賽係2002年，當時美國以106比82擊敗俄羅斯。尾場由立陶宛對阿根廷。