阿金4強惡鬥大威

【本報綜合報道】衞冕女單冠軍「阿金」克莉絲塔絲，在8強略現疲態下，要激戰三盤才以6比4、5比7及6比3險勝今年法網亞軍施杜素，出線過程認真辛苦！「阿金」晉級4強後遇上硬仗，面對狀態大勇嘅「大威」V威廉絲，「大威」喺8強打得較輕鬆，7比6（7比5）及6比4直落兩盤淘汰「女版保方」施姬艾禾妮。

「阿金」8強戰大吃苦頭，首盤第三局已被施杜素打破發球局，一度落後2比4。幸好「阿金」及時回勇，連取四局，結果首盤大逆轉贏6比4。雖然及後被施杜素以7比5追番一盤，但經驗豐富嘅「阿金」最後一盤顯出盟主風範，以6比3贏埋，總盤數勝2比1獲得出線資格。