花式滑水潮！爽！
炎炎夏日，最好玩水消暑，但究竟點樣玩水先叫做潮？淨係睇吓一班走在潮流最前線嘅藝人余文樂、張栢芝、李璨琛等都鍾意玩花式滑水（Wakeboard）就知啦！不過，原來要將呢項「潮物」玩得出神入化並非難事，港隊代表鄭偉南、Alice都話女仔要入門相當簡單，而男仔想技術「升呢」亦易過借火，睇嚟大家都再無藉口同Wakeboard Say No啦！
女仔唔夠力利「起水」
玩咗Wakeboard都有四年嘅Alice，就鼓勵更多女性加入呢項潮流運動：「可能啲女仔會有誤會，見到玩Wakeboard嘅人畀隻艇拉住，一定要好大力先玩得，其實啱啱相反，女仔唔夠力先係一個優勢，因為入門嘅『起水』動作，就係唔可以同隻艇鬥力，所以一般嚟講，女仔要入門係比較容易。」
「起水」即係能夠用塊滑板企喺水上滑行，初學者可以用腰力及挺胸動作，由手借助快艇拉力將成個人升起。當成功「起水」後，就可嘗試以S形出浪入浪嘅滑動，繼續做更多花式。
打空翻感覺High爆
依家係港隊代表、去年喺亞洲賽贏得冠軍嘅鄭偉南就鼓勵一眾男士唔好洩氣，因為好多時男仔都可以後來居上：「雖然女仔初時會做得比男仔好，但當練到一啲高難度動作，有肌肉去支持嘅『大隻男』就可以『升呢』得好快，例如打空翻等，更可以親身感受玩Wakeboard嘅終極最High，嘗試到好似空中飛翔嘅感覺！」
不過，咁唔代表男士們可以喺滑水界「也文也武」，因為Alice話有唔少熟手嘅女仔為咗唔想輸蝕，近年嚟都開始由頭學起，重新執正自己每個動作，希望可以打好基礎，彌補先天不足，做得比男士更好、更勁、更型！
圖／文：司徒子文