車仔小將入營學獨立
三十八個香港車路士足球學校學員，日前終抵達位於英國南部嘅Lancing College，與來自世界各地嘅足球小將一同接受車路士青訓教練受訓一個星期。學員在受訓周內就如隊長泰利小時候一樣，需要嚴守訓練營紀律，準時起床、執房、冇得打機，仲要自己一間房瞓覺，目的就係要學員學識自己獨立。
為推動全球足球青訓兼揀選明日之星，車路士每年夏季均會在Lancing College舉行訓練營，讓世界各地嘅足球小將接受英超青年軍式訓練。
騷哥利畀球探睇
香港車路士學校今次揀選三十八名年齡介乎八至十七歲嘅學員赴英受訓，抵埗後先與其他國家學員會合，基於外國學員大部分都超過十二歲，所以身形明顯較為魁梧。
不過，香港學員未有因此而獲得特別照顧，各人被分配好組別後，隨即落場訓練。因一眾車路士教練對香港學員缺乏認識，所以熱身後都叫佢哋盡量展示個人技術，之後就進行控球、傳球及合作性等訓練，而學員在離開訓練營之前，更會與其他球員進行比賽，表現優異嘅將有機會獲得車路士球探邀請，留低喺英國做「藍戰士」，成為車路士青訓學員。
圖、文：法比加輝