卜比Sir寸卡比路唔掂

知錯能改 畀多次機會

卜比Sir作為六六年世界盃冠軍功臣，梗係要問吓佢對英格蘭喺南非世界盃嘅睇法啦！「英格蘭今次表現真係好差，班球員完全發揮唔到球會時水準，呢隊波同六六年冠軍隊真係差好遠，當時我哋有一位好領隊藍西爵士，所有球員都好尊重佢，球員之間亦好團結，但今屆世界盃我見唔到呢樣嘢。」

言下之意，卜比Sir咪即係覺得卡比路唔掂？「我覺得應該畀多次機會佢，卡比路已經知道自己犯咗乜錯，所以上星期國際熱身賽對匈牙利，佢用咗好多唔同球員，希望英格蘭喺歐洲國家盃及四年後嘅巴西世界盃會有好表現啦！」

下任領隊 最緊要主攻

卜比查爾頓愈講愈有中氣，十足十「球壇張三豐」，其養生之道，相信係同佢性格豁達有關，可能佢經歷過五八年慕尼黑空難，親身經歷過生死之間，所以足球對佢嚟講只係一場遊戲：「有人話做英格蘭領隊係世界上最困難工作，我唔認同，因為足球只係消閒活動，做領隊有幾難？呢個世界上有更多更艱難嘅事喇！」

樂比仔最後一個問題，費爵爺已經做咗二十幾年曼聯領隊，邊位有條件接佢棒？而做曼聯領隊又要具備乜條件。卜比Sir講出首要條件：「作為曼聯領隊，一定要帶領球隊進攻，因為曼聯從來唔踢防守足球。」照咁睇，莫連奴都幾難如願做曼聯領隊！

圖、文：樂比堅尼