世界盃八強隊伍巴拉圭計劃於十一月十七日訪港與香港隊交手，唔少球迷第一時間諗到「phone波女神」拿莉莎會唔會一齊嚟；足總主席梁孔德透露，賽事搞手已經聯絡緊拿莉莎，若然女神駕到，賽事吸引力勢必大增！
「11．17」香港對巴拉圭的國際熱身賽雖仍未落實，但賽事搞手都有一定搞騷技巧，既然請得巴拉圭東訪，冇理由唔請埋佢哋嗰位天字第一號女粉絲「phone波女神」拿莉莎。梁孔德表示，足總日內將與賽事主辦單位就今次國際熱身賽進行商討，希望到時有好消息。
巴拉圭原定於十月訪港，但因未能召回大部分主力，故訪港日期順延至十一月中，而主辦單位計劃安排巴拉圭踢兩場，在中國一個城市及香港兩站比賽，每站成本約為五百萬元，足總原則上希望香港站票價不要定得太高，最貴門票不要超過三百八十元。