林書豪投勇士即被起底
【本報綜合報道】美籍台灣球手林書豪（Jeremy Lin）尋日正式加盟NBA球隊金州勇士，成為球隊史上首個華裔球員，兼56年後首個哈佛出產嘅NBA球員。一夜成名令「小林」成為傳媒焦點，連佢自己都話︰「實在太不可思議！」
祖籍浙江 識講國語
勇士昨宣布林書豪加盟，結果吸引大批電視台同印刷媒體採訪，林書豪坦言：「實在太不可思議，我從未見過咁嘅情景。」由於勇士所在城市三藩市擁有大批華人，所以林書豪目前已經成為當地名人，不過「小林」表現得好謙虛：「今日就好似夢想成真一樣，因為我一直希望打NBA。睇住史比威爾嘅海報、着住祖史密夫嘅波衫長大。」
其實林書豪之前打Ivy League時已經好勁，係Ivy首個錄得1,450分、450個籃板、400次助攻同200次偷波嘅球員：「我明白NBA好少亞洲球員，但或者我會打破呢個局面。」隨住林書豪加盟勇士，傳媒開始狂挖呢位早前被《ESPN》譽為全美最全能12名球員之一嘅歷史，好似話佢祖籍係浙江嘉興平湖，每年都會返鄉下捐錢同教細路打波、係虔誠嘅基督徒，話唔打波就希望做牧師、識講普通話、老竇林杰明係籃球癡，自細就栽培佢哋三兄弟打籃球、覺得自己最似太陽後備達基斯（Goran Dragic），仲揚言自己打波風格好適合打NBA，因為自己擅於擋拆，真係要拭目以待呀！