猴擒保耶出招冧羽翹

話說伯明翰尋日到咗會場之後，保耶一個人周圍行，行到去一排預備拍賣嘅畫前面停步欣賞，此時一名闊太行近，兩人首先點頭，後來就開始搭訕，跟住就雞啄唔斷，直到晚宴開始先至坐番埋位。

過咗無耐，大會主人諗住介紹晚會表演嘉賓羽翹畀大家識，點知保耶自己爆響口，話已經識咗羽翹，仲已經約好咗第日食飯咁話，極速識女伎倆令在場人士嘩然。跟住另一表演嘉賓林莉亦聞風而至，呢名有「翻版林志玲」之稱嘅○五年港姐季軍，係咁黐住保耶話要一齊影相，保耶當然唔會托手㬹啦。

行慢兩步電話傳情

到大隊離開之時，保耶就專登行慢兩步走去羽翹身邊，攞個電話出嚟互send SMS，睇嚟似交換Facebook或Twitter戶口嗰隻，保耶追女仔真係有啲計。