施積上陣五五波
伯明翰昨抵港，其中一個焦點當然係長人施積。呢位身高達2米02嘅塞爾維亞前鋒，將會成為伯明翰今季主攻手。領隊麥利殊表示，經過世盃之後，施積比其他球員較為疲倦，故季初未必會派佢上陣。至於星期日鬥港聯嘅熱身賽，施積上陣機會都係一半一半。
對於今場熱身賽，麥利殊顯得相當積極。三點鐘抵港後，麥Sir就即刻向香港接待人員要求到場地進行訓練，大約五點鐘左右，球隊安排到京士柏「開操」，所有球員都有出席。
麥利殊話英倫好少出現潮濕酷熱天氣，所以會好好利用新環境去操弗球員，為英超球季作好準備。提到新球季，麥利殊就唔敢有太大期望，始終每季形勢都唔同，好難定立目標。當然，所有球隊都希望贏得冠軍，但伯明翰好了解實際情況，球員只要全力搶分，爭取最佳名次，相信球迷以及高層都唔會有怨言。