伯明翰抵港唔畀Wet！

以往有唔少球隊訪港時，總會乘機出外享受多姿多彩嘅夜生活。但麥利殊就有以下意見：「伯明翰到香港唔係開派對，球員係有任務在身。我重申，今次亞洲之旅唔係玩樂團。」據悉球隊已經頒下「禁玩令」，球員嚴禁進入所有娛樂場所，包括酒吧及夜總會，違規者必遭嚴重處分。

港聯方面，隊長陳偉豪就唔敢對賽果有太多預測，但保證球員會盡力而為。考慮到今場比賽屬表演性質，所以港聯絕對唔會死守，一定會同伯明翰鬥攻，亦希望從罰球攻勢撕破對手防線。當被問及揀咗邊位球星交換波衫時，陳偉豪自己都有唔少經驗，而今次想試吓換守門員件衫。