今屆世盃，大家除咗會記得科蘭、湯馬士梅拿同卡斯拿斯呢啲球星喺球場上嘅精彩表現外，有兩位另類主角大家亦肯定唔會忘懷，一位係巴拉圭嘅「Phone波女神」拿莉莎，而一位當然要數八爪魚神算保羅啦！呢條德國神奇八爪魚今屆世盃預測咗八場全部估中，累積賠率達到479倍，外國博彩公司都要向佢寫個服字，而因為佢估中西班牙捧盃，估計業界要額外派彩50萬鎊（約580萬港元）。
保羅世盃八連中，成為博彩業界奇葩，根據該八場賽事嘅馬會賠率，首七場以主客和賠率投注，決賽就買奪標賠率，累積賠率達到479倍，如果你由第一場開始投注10蚊開始「滾雪球」，最終派彩就有4,790蚊。
英國博彩公司威廉希爾發言人透露，由於保羅預測非常準確，好多散客都跟住買，雖然絕大多數都係由10鎊至200鎊嘅「雞仔注」，但滾吓滾吓又幾可觀，發言人稱：「班客好迷信，而且數量都唔少，有成幾千人。」博彩公司要為這班「保羅粉絲」派彩，估計額外派多50萬鎊。
博彩業亦慶幸，八爪魚壽命只有三、四年，現年兩歲半嘅保羅應不能為下屆世盃作預測，而且亦有大量賭客唔理保羅嘅預測，按自己意願下注，今屆投注總額就高達10億鎊（約117億港元），所以影響唔到博彩公司嘅盈利。
保羅出道至今，先後預測咗14場賽事，包括兩年前歐國盃估６場５中，今屆世盃估８場全中，累積14場估中13場，勝率高達93％，可以話係賭波界嘅ＭＶＰ。