德迷追殺阿Paul
德國於４強戰以０比１不敵西班牙，無緣入決賽，令本來充滿希望的德國球迷極度傷心，取消所有大型慶祝活動，部分老羞成怒者更遷怒於「神奇八爪魚」阿Paul保羅！保羅貼中西班牙殺敗德國，惹起激進德迷極度不滿，於網上火速流傳「八爪魚菜譜」，誓要將「二五仔」生劏活剝，水族館已全面加強保安，力保阿Paul今日為季軍戰及決賽做預測！
４強鬥西班牙賽前，保羅「無情」爬進西班牙方格內，已令德國球迷非常忐忑，因為「神奇八爪魚」預測賽果實在太準了，本屆賽事百發百中，08年歐國盃決賽周亦６場中５場，命中率高達83％。德國國民都希望今次保羅失準，但最後西班牙贏１比０出線，令德國萬千球迷大失所望。
水族館加強保安護波神
保羅連累德國輸波，不少人於網絡留下粗言穢語怒斥保羅，更上載一系列「八爪魚食譜」，誓要置牠於死地，更提議將生劏過程作電視直播！奧柏豪森的Sea Life水族館非常擔心保羅「人身安全」，故已全面加強保安，以慎防德迷潛入館內找保羅晦氣。為此水族館工作人員忙得團團轉，並且顯得心神恍惚。德國季軍戰將鬥烏拉圭，保羅將會再顯神通預測賽果，但該館竟然將德國對手由烏拉圭寫成巴拉圭，而且出通告的日期，亦由７月８日寫成９日，擺咗個大烏龍！西班牙首相薩帕特羅則於一個電台內笑稱，正考慮派一支保安隊保護阿Paul。
勒夫︰爭季軍唔會有慶祝
德國４強落敗叫球迷傷心不已，國內有關方面已經安排，如球隊奪冠就會於柏林的勃蘭登堡門前進行盛大慶祝會，但球隊未能打入決賽，領隊勒夫已表明：「我們只能爭奪季軍，相信事後不會有任何慶祝活動。」事實上，國內早前仍一片歡騰，討論如果捧盃，就應該於慕尼黑舉行慶祝盛典，因為德國隊中有８名球員來自拜仁，但原來一切都言之過早，現時所有希望已經幻滅。
本報綜合報道