阿Paul貼西班牙德國躉未驚過

自從有超能力的八爪魚先生阿Paul於今屆世界盃估五場波全中後,好多人都關心今晚的德西大戰,阿Paul會揀哪支球隊,結果身處德國奧柏侯遜水族館的阿Paul決定「手指拗出唔拗入」,投西班牙一票,令好多德國球迷大失所望,不過亦有德國球迷未驚過,因為兩年前歐國盃決賽德西大戰,阿Paul捧德國,但最終德國以○比一不敵西班牙!

兩年來貼11場中10場

出生於英國的阿Paul,是一隻被稱為有預知未來能力的八爪魚,它在兩年前歐洲國家盃開始投身足球名家行列,與其他球評家一起爭飯食,在兩年前的歐洲國家盃已經有不俗成績,貼六場中五場,取得超過八成命中率,今屆世界盃再接再厲,預測德國隊至今五場賽事,結果五場賽事阿Paul都估中,當中包括分組賽德國不敵塞爾維亞。

歐國盃德西決賽估錯過

阿Paul預測的過程非常簡單,水箱內會放兩個盒子,盒子會有兩面不同的國旗,而盒子的大小及內放的食物都是一樣,看看哪個盒子最終能吸引阿Paul,就代表阿Paul最終選擇哪支球隊獲勝。

據水族館負責人表示,阿Paul估波生涯唯一一次估錯,就是兩年前歐洲國家盃決賽,當時他已經連中五場,但在決賽捧德國,結果德國以○比一不敵西班牙,令阿Paul首次損手。有些德國球迷認為,阿Paul今次揀西班牙是好兆頭,因為阿Paul的預知能力可能只限比賽初段,今場鬥西班牙是時候開番對家了!

■本報綜合報道