【本報綜合報道】巴拉圭國家隊已告別世盃，如果問你對邊位球員有好感，相信好多人都答唔出，唯一有印象就係巴拉圭女球迷「手機女郎」拿莉莎。呢位模特兒擁豐滿上圍，每次都着性感裝束為國家隊打氣。一招雙胸夾手機更令佢人氣急升，風頭蓋過國家隊。最近西班牙《馬卡報》記者特登訪問呢位巴拉圭奇女子。拿莉莎承認喺鏡頭前面使出雙胸夾手機，純粹係博出名嘅舉動，而且幕後仲有一班高人指點添！
拿莉莎今次咁搶鏡，要多謝巴拉圭國內網站ULTIMAHORA.COM，佢哋搵到咁性感嘅拿莉莎，仲諗埋「雙胸夾機」絕招，想唔多人睇都難喇！莉莎話天下間好身材嘅女人周街都係，要增加自己曝光率就一定要略施小計。她表示：「我從頭到尾都希望自己更加出名，而現今情況簡直令我感到驚訝。」拿莉莎藉世盃谷人氣，佢話要多謝主辦國南非以及巴拉圭國家隊。另外，有大型電訊公司諗住搵拿莉莎拍廣告，希望佢可以喺電視面前，再次使出成名絕招雙胸夾手機。